E veston los ausbercs els elmes pabies,
Ez an passada l’aiga e vengon endemes,
E dedins en la grava comensa lo chaples.
Entrels brans e las massas e los fers mortales
D’entr’ambas las partidas se feron demanes ;
Peiras e dartz e flechas hi vengon tant espes
Que las boclas pessian e cristals e orfres
Els escutz e las selas e los peitrals els fres.
Pero cels de la vila los an aisi repres
Que firen los en menan e vencutz e malmes,
Qu’ins en l’aiga trabucan dos e dos, tres e tres ;
E laïns ebateron Raülil Campanes ;
E qui sap nadar nada, e qui no sap mors es.
Capels e dartz e lansas els gonfainos els fres
S’en dechendon per l’aiga, que la onda los pres.
Al partir de la guerra n’i remazo d’estes.
E li Frances repairan de gran felnia ples,
E lo coms de Montfort durament los enques :
« Senhors, beus deu hom dar cavals e palafres.
« Tuit devem aver joya, car tan be vos es pres
« Dels homes de la vila c’avetz vencutz e pres.
« Mas, per santa Maria, tant son pros e cortes
« Que laichat lor avetz del pretz e de l’arnes. »
E lo coms passec l’aiga am Lambert de Cales,
E parla e cosselha el castel Narbones ;
E fo y lo cardenals el senher avesques,
E lo coms de Saisho, en Aldrics lo Flames,
N’Amaldrics de Crio, en Americs de Bles,
En Gilabertz de Rocas, en Ricartz de Fores,
En Bocartz, en Alas, en Ugo de Lasses.
— 8025. Corr. dels pres ? — 8030. Amaldrics, ms. Aimerics.
