Que l’ausberc e li elme e l’escut e l’arson
Els entresens mirable el frezel el boton
E[l] cavals e las tressas e l’aur el cisclaton
Que de sanc e de plagas semblavan vermelhon.
Tant fon granda la noiza e lo critz el reso
Que motz dels de la vila s’en intran a lairo,
Ques banheron en l’aiga del fossat lo mento.
E li autres combaton laforas el cambon,
Ciutada e borzes e arquier e pezon ;
Ez an mort en la vinha Guilheume Caudaron,
E li lor e li autre sobre lui contendon ;
En Sicartz de Montaut los defen a bandon.
Li cairel e las astas e li reng del penon
E l’escut e li elme el caval el planson
Hi estan plus espes qu’espina d’erison ;
Pero ilh de lafora l’en levan de randon.
Mas una gens estranha, Blaventi e Breton,
Vengon permei las plassas desgarnit e felon,
E portan foc e palha e falhas e tizon,
E corron vas la vila, e escridan Crion !
E dedins los receubon sirvent e donzelon
Que los feron els brizan pel peh e pel brazon,
E lo coms s’en repaira ab la poblacion.
El jorn de Pentecosta can granan li broton
Lo coms auzic la messa e la profession,
Ez en apres s’en intra dedins .I. pabalhon,
El cardenals e l’abas e l’avesque felon,
N’Amaldrics en Bochartz e so frairen Guio,
En Alas, en Folcautz e li autre baron :
— 7813. Ms. Guilheumes. — 7825. brazon, ms. brizon. Lacune après ce vers ? La réd, en pr., ici très-sommaire, n’est d’aucun secours.