En Robertz de Belmon, en Robertz de Chalon,
En Robertz Penquenis, en Robertz de Chinon,
En Raolf de Peitieus, en Giraus de Lansson,
En Raymbautz de Trias, en Johans de Bollon,
En Guis de Mauretanha, en Rainer lo Frizon,
N’Amaldrics de Luset, en Bertrans de Corsson,
E las autras cumpanhas, orgolhos e felon.
Aisi vengon essems Frances e Bergonhon,
[Qu]e debrizon la terra e l’erba el sablon.
Els dedins los receubo ab fin cor e ab bon,
L’adreitz Rogers Br. e li autre baron,
Cavaliers e borzes, a la comensazon,
El pobles de la vila el sirvent elh geudon ;
E mezon la barreira e la defension,
E desus la senheira qu’era de Mont Aigon.
N’Alias d’Albaroca, .I. valent Braimanson,
El en Br. Navarra e l’autri companhon,
Am lor n’Otz de Tarrida, en Guirautz de Gordon,
El valens n’Amalvis, de la Mota n’Ugon,
En Br. de Sent Marti, R. de Rossilhon,
En Peire de la Isla qui ferit del planson
Lo primer que venia sobre la garnizon,
Que debriza la lansa e reten lo trenson,
Cels suffriron la guerra a la comensazon.
Es escridan Tholoza ! e Montfort ! e Crion !
E las trompas els grailes fan retendir lo tron.
Lansas e dartz e picas e massas e brandon
E gazarmas e peiras e apchas e bollon
E sagetas e flechas e cairel e pilon
E motas de partidas i vengon d’aviron,
— 7794-5. Ms. quel f. || Lo primers. — 7801. bollon, corr. bolzon ?
