« Que per la mia intrada n’ichiran li trachor ;
« Que ja tant cant ieu viva faizit caminador
« A mi ni a la Gleiza no faran mais paor. »
Lo coms el cardenals e li cosselhador,
N’Amaldrics e l’ivesque e li autri doctor,
Cosselheron essems a cosselh celador.
« Senhors, » so ditz lo coms, « a totz vos fas clamor
« Car tuit mei soldadier s’en volon ir alhor,
« Car ieu non ai quels pague ni no sai dire dor.
« Sapchatz aquesta vila m’a mes en tal error
« Que cascun jorn me baicha lo pretz e la valor.
« D’estas doas partidas me don Dieus la milhor,
« Que, per santa Maria qu’es a Rocamador,
« O m’aucira la vila o ieu aucire[i] lor !
— Coms, » ditz lo cardenals, « aquel Dieus qu’ieu azor
« Conoih ben la drechura, cal son li pecador. »
La vespra del dimenge del santisme santor
Que Dieus dec als apostols clartat e resplandor,
Lo coms Simos se leva gran mati a l’albor
Ab sa bela companha e li avantador
Per las vinhas destruire e per l’autra labor ;
E perprendon las plassas vas l’olm de l’Orador.
Els baros de la vila, li menre el major,
Que so adreit per armas e bon defendedor,
Cel se te per delhivres que denant l’autre cor
Per garnir las trencadas e la vila entor.
Cavaler e borzes e Braiman feridor
El valens adreitz pobles firens cumbatedor
Elh sirvent frontalier e li dardejador
Prendols ortz e las vinhas e li frondejador,
— 7721. el, ms. els.
