Ab bona companhia, ab cor defendedor,
Per amparar la vila e per defendre lor.
Anc no vis per dreitura segon de sa ricor,
Pus adreit cavalier per complida lauzor,
Qu’el a sen e largueza e cor d’emperador,
E governa paratge e capdela valor.
Per restaurar dreitura e per franher dolor
Venc amparar Toloza el comte per amor ;
Ab lui R. de Vals qu’es de son parentor,
Vezias de la Mota, .I. valent valvassor ;
El baron de Capitol qu’eran governador
Intreron ab gran joya, el Braimanso ab lor.
El baron de Tholoza ab lo poble menor
Les aneron recebre ab joi e ab baudor.
Li crit e las senheiras el corn el trumpador
Fan retendir la vila e esclarzir la brumor.
E lo coms de Monfort cant auzit la rumor
Ab petita companha passec l’aiga ves lor,
E laichec establit l’Ospital e la tor,
E es vengutz al seti e a parlat ab lor :
« Senhors, » so dit lo coms, « vostre ennemic pejor
« Perdon l’aiga e la vila els pons e la valor ;
« Ez ai laïns auzida tant granda tenebror,
« Sapchatz c’anar s’en volo, o amics lor socor. »
Ab tant veus .I. mesatge que lh’a dit la veror :
« Senher coms, en Toloza son intrat valedor,
« Ab n’Br. de Casnac sinc cens cavalgador
« Que defendran la vila, e vos combatetz lor.
— Amics, » so ditz lo coms, « ilh an faita folor,
— 6697. Réd. en pr. Ramon del Valz. — 7698. Corr. de Lomanha ; cf. v. 8959 Vezias Lomanhes. Manque dans la réd. en pr.