« Quels garda els governa e sembla e lor païs. »
Tant parleron ensemble tro que lo jorn falis,
E a l’albor del dia, cant lo temps abelis,
S’en es ichitz l’avesques en Folcaut de Berzis,
Ez am lor la comtessa en Peire de Vezis ;
E passan los boscatges per paor dels faizis.
E remas en la vila lo rics coms palaizis,
En B. de Cumenge, en Bernatz Moltaldis,
El pros Rotgiers Bernatz quem daura e esclarzis,
En Dalmatz de Crissil qui manda e enantis,
Bertrans Jordas e n’Otz e l’adreitz n’Amalvis,
Els bos n’Ucs de la Mota a cui pretz es anclis,
En W. Arnaudos qu’es be certas e fis.
En Bernatz de Cumenge a de lor comjat pris,
E vai s’en en Gasconha encontrals enemics,
Per refermar la guerra e per cercar en Joris.
Els baros de la vila, ab los cors enteris,
Cavalgan per las terras e cercan los camis,
Els castels e las vilas e los bo[s]cs els traïs,
Don intra cada dia la carns el pas el vis.
E el camp de Montoliu es plantatz us jardis
Que tot jorn nais e brolha, [e] es plantatz de lis ;
Mas lo blanc el vermelh qu’i grana e floris
Es carn e sanc e glazis e cervelas geris ;
Entr’esperitz e armas e pecatz e mercis
Novelament i pobla iferns e paradis.
Cominalment s’alegra la vila e s’esbaudis,
E si ditz l’us a l’autre : « Ar nos creis jois e ris,
« Per so qu’en Pelfort intra que es pros e savis,
« E mals e bos e savis e nostre cars amis. »
— 7125. Corr. so sembla ? — 7134. manda, corr. monta ? — 7149. Mieux vaudrait pecat.
