« E sius troba sa foras semblaret[z] ben brico. »
Ez eli s’en torneron viatz e de rando ;
Mas mentre s’acosselhan per la vilailh baro,
La mainada del comte, sirvent e donzelo
Lor debrizen las archas e l’aver se prendo ;
E dizo a lors ostes l’escudier els garso :
« Oi recebretz martiri o daretz rezemso,
« Car vos etz en la ira de mosenhen Simo. »
Et eli respondero entre dens a lairo :
« Dieus, co nos avetz meses el poder Pharao ! »
Per las carreiras ploran donas e efanto ;
Mas per tota la vila escridan en un so :
« Baros, prendam las armas, car vezem la sazo
« Que nos er a defendre del fer e del leo,
« Car mais val mort ondrada que remandre en preizo ! »
De totas partz lai vengo corren e d’espero
Cavaler e borzes e sirvent e geudo,
Que cascus d’els aporta complida garnizo :
O escut o capel, perpunt o gonio,
E apcha esmolua, faucilha o pilo,
Arc manal o balesta o bon bran de planso,
O cotel o gorgeira, capmailh o alcoto.
E can foro ensemble entrelh filh elh pairo,
E donas e donzelas, cascus per contenso,
Comensan las barreiras, quec denan sa maizo.
Li escon e las archas el tinal el pilo
— 5097. Réd. en pr. Et adonc quand lodit poble es estat retirat dins la vila, an trobat que lodit evesque, an las gens que intrats eran del comte, avian deja pilhada et raubada la plus grand partida de ladita vila, violadas famas e filhas tantas que grand pietat era de ho veser lo mal que lodit evesque fec far en pauca hora dins lodit Tolosa (p. 79). — 5113. de, corr. o ou ab ?
