« E porto crotz e glavi ab que jutjo membrat,
« E bona patz en terra, e tengan castetat,
« E que porto dreitura e vera caritat,
« E nulha re no fassan que Dieus aia vedat.
« E qui mais n’i aporta ni plus n’a prezicat
« Non o a ab mon dig ni ab ma volontat. »
Ramons de Rocafolhs a en aut escridat :
« Senher dreitz apostolis, merce e pietat
« Aias d’un effan orfe, jovenet ichilat,
« Filh de l’onrat vescomte que an mort li crozat,
« En Simos de Montfort cant hom li ac lhivrat.
« Ladoncs baichec Paratges lo tertz o la mitat,
« E cant el pren martiri a tort et a pecat.
« E no as en ta cort cardenal ni abat
« Agues milhor crezensa a la crestiandat.
« E por es mort lo paire el filh dezeretat,
« Senher, ret li la terra, garda ta dignitat !
« E si no laih vols rendre, Dieus t’en do aital grad
« Que sus la tua arma aias lo sieu pecat !
« E si no la li lhivras en breu jorn assignat,
« Eu te clami la terra el dreg e la eretat
« Al dia del judici on tuit serem jutjat !
— Baros, » ditz l’us a l’autre, « mot l’a gent encolpat.
— Amix, » ditz l’apostolis, « ja er be emendat. »
E son palaitz s’en intra e ab lui sei privat,
E los comtes remazo sus el marbre letrat.
Ditz Ar. de Cumenge : « Gent avem espleitat ;
— 3361. Ms. crozatz. — 3363-4. Le sens serait plus satisfaisant si on intervertissait l’ordre de ces deux vers, et corrigeait pren en pres : « Et lorsqu’il prit martyre... alors Parage baissa... » — 3367. pois es, ms. por as.
