Can aicels de lafora no pogron dins intrar,
Dreitament a las tendas s’en prendo a tornar :
Vel[s] vos asetiatz totz essems al dinnar.
Mas Simos de Montfort fai per Murel cridar,
Per trastotz los osdals, que fassan enselar,
E fassan las cubertas sobrels cavals gitar,
Que veiran dels defora sils poiran enganar.
A la porta de Salas les ne fan totz anar,
E cant foron defora pres se a sermonar :
« Senhors baro de Fransa, nous sai nulh cosselh dar
« Mas qu’em vengutz trastuit per nos totz perilhar.
« Anc de tota esta noit no fi mas perpessar,
« Ni mei olh no dormiron ni pogron repauzar ;
« E ai aisi trobat e mon estuziar
« Que per aquest semdier nos covindra passar,
« C’anem dreit a las tendas com per batalha dar ;
« E si eison deforas, quens vulhan asaltar,
« E si nos de las tendas nols podem alunhar,
« No i a mas que fugam tot dreit ad Autvilar. »
Ditz lo coms Baudoïs : « Anem o esajar,
« E si eisson defora pessem del be chaplar,
« Que mais val mortz ondrada que vius mendiguejar. »
Ab tant Folquets l’avesques los a pres a senhar.
Guilheumes de la Barra los pres a capdelar,
E fels en tres partidas totz essems escalar
— 3032. Réd. en pr. ... et se son metuts a manjar et beure sans far degun gait et sans se doubtar de re (p. 53). — 3037. fan, corr. fai ? — 3039. sai, ms. sei. — 3046. Il doit manquer un vers après celui-ci, car le sens reste suspendu. — 3054. Et avia (le comte de Montfort) faictas tres bandas de sas gens, dont era capitani de la premiera Verles d’Encontre, et de la seconda Boucard, et de la tersa era capitani et gouvernado lodit C. de M. (p. 53).
