En Guios de Montfort, cant auzi la rumor
Que li Frances so mort, n’ag al cor gran tristor,
Que ges non pot estar que ab los olhs non plor ;
E plora e fai gran dol e mena gran dolor
De la onta que a preza e de la dezonor.
Erals laichem estar, qu’ieus vulh parlar d’alhor,
Quel bos reis d’Arago desus son mialsoldor
Es vengutz a Murel e pauza i l’auriflor,
E a l’asetiat ab mot ric valvassor
Quels i a amenatz e traits de lor honor.
De cels de Catalonha i amenet la flor,
E de lai d’Arago trop ric combatedor.
Ben cujan ja no trobon en loc contrastador
Ni aus ab lor combattre nulhs om garrejador.
E tramet a Toloza al marit sa seror
C’ades venga a lui, ab lui sei valedor,
E que venga la osts e li combatedor :
Qu’el es aparelhatz quelh renda sa honor,
Al comte de Cumenge e al seu parentor ;
Puis ira a Bezers per forsa e per vigor ;
No laissara crozat en castel ni en tor
De lai de Montpesler entro a Rocamador
Que nols fassan morir a dol e a tristor.
El pros coms can o saub non o mes en tardor
Ans venc dreit al Capitol.
— 2886. La réd. en pr. ajoute : dont totas sas gens se sont fort esbayts quand ainsin l’an vist plorar (p. 51). — 2890. Dessin représentant le siége de Muret. — 2899. quelh, corr. quel, et supprimez la virgule à la fin du vers ? — 2905. El, ms. Els.
