Li Frances esperonan tot suau e dapas,
Li elme tuit embronc contra la terra bas.
Nous cujetz pas que fuian ni que tornon atras :
De grans colps be ferir no son ilh pas escas.
La plassa es bela e longua e li camp son tuit ras ;
D’ambas partz n’i morion de magre e de gras,
Aissi co m’o retrais maestre Nicholas.
Cels de l’ost los esgardan que n’an pois gran esglas,
Car el foron vencu.
Lo comte de Monfort que a Castel nou fu
Mentre qu’els se combaton a forsa e a vertu
Fai tost garnir los seus que ab lui son venu :
Ditz lor que[l] companho que defors son ichu
E mosenher Bochartz an perdu lor traü.
Ben sap entre se eih que si el so vencu
El a tota la terra e lo castel perdu,
E que sera dedins e pres e retenu,
E jamais no n’istra tro que sei[t] cofondu.
A l’enans que el poc s’en es foras issu,
Garnitz de totas armas, de lansa e d’escu.
Cel que son dins a pe an le castel defendu
Entro que ilh torneron.
