Page:L’Hospital - Discours sur la pacification des troubles de l’an 1567, 1568.djvu/13

Royaume de feu, de ſang, de cruauté, de ruyne, de deformité, de peſte, de famine, de pauureté, de ſolitude, de voleurs, de brigands, & d’eſtrangers, qui occuperont le nid vuide. La pauure Champagne nous ſerue d’exemple, qui eſt déchiree ſi miſerablement qu’à veüe d’œil, il faut que les habitans meurent de male faim, & de rage. Certes ceſt embraſement eſt ſi ardent & vniuerſel par tout ce Royaume, que la longueur eſt l’entiere ruyne, ſubuerſion, & aneantiſſement d’iceluy : voire (quand meſme on eſtancheroit ce mal des auiourd’huy,) il ſe trouueroit merueilleuſement apauuri par les degaſts extremes, pernicieux ruinements, demolitions, larrecins, pillages, & autres choſes ſemblables, qui ia ont eſté commiſes, & qui ne ſont que coups d’eſſay, au regard de ce qui eſt à craindre : c’eſt à ſçauoir, que ſans eſpoir de paix les