| 602 | L’ALCORAN. |
gnes ſeront ſemblables à la laine cardée qui s’abaiſſe, perſonne ne demandera à ſon voiſin quel il eſt, & ſe regarderont les uns les autres, les infidelles ſouhaiteront de ſe racheter de ces peines par la perte de leurs enfans, de leurs femmes, de leurs freres, de leurs compagnons, de leurs voiſins, & par la perte de tout ce qui eſt en terre. La flamme du feu s’eſlevera sur eux, & leur bruſlera la peau de la teſte, ils appelleront ceux qui ſont reſtés derriere eux, qui auront comme eux abandonné la loy de Dieu, & les avaricieux qui auront accumulé des tréſors. L’homme a eſté creé timide, il eſt effrayé lors qu’il luy arrive du mal, & eſt orgueilleux lors qu’il luy arrive du bien, excepté les fidelles qui ſont fermes en leur foy, qui perſeverent en leurs prieres, qui font des aumoſnes aux pauvres mendians & aux pauvres honteux, qui croyent au jour du Jugement, qui craignent la punition de Dieu, & qui ne cognoiſſent point d’autres femmes que les leurs & leurs eſclaves, ils ſeront exempts d’affliction au jour du Jugement, ceux qui feront le contraire ſeront au nombre des injuſtes. Ceux qui effectuent ce qu’ils ont promis, & qui conſervent fidellement ce qui leur a eſté confié, qui diſent la verité en teſmoignage, & ceux qui font leurs prieres au temps ordonné, ſeront honnorez dedans le Paradis. Pourquoy eſt-ce que les infidelles qui ſont auprés de toy jettent la veüe à droict & à gauche avec orgueil ? demandent-ils d’entrer dans le Paradis & d’eſtre ſauvez ? Nous les avons creés comme les autres hom-
