| 564 | L’ALCORAN. |
Loüé ſoit le nom de Dieu ton Seigneur honneur & gloire luy ſont dües eternellement.
LE CHAPITRE DU JUGEMENT,
contenant quatre-vingt dix-neuf verſets,
eſcrit à la Medine.
U Nom de Dieu clement & miſericordieux. Le jour du Jugement arrivera, perſonne ne le peut denier ; Ce jour pluſieurs ſeront affligez & humiliez, & pluſieurs ſeront eſlevez & reſjouys, la terre tremblera, les montagnes s’ouvriront, & ſeront diſperſées comme la pouſſiere que le vent emporte, vous aſſiſterez à ce jour du Jugement en trois façons, les uns[1] auront en leur main droite le livre où ſeront eſcrites toutes leurs actions, les autres[2] l’auront en leur main gauche, & ceux qui les ont precedez à bien faire[3] ſeront les plus proches de ſa divine Majeſté & les plus eſlevez en Paradis, il y en aura un grand nombre des premiers ſiecles, & peu des derniers, ils ſeront appuyez ſur des licts ornez d’or & de pierreries, ils ſe regarderont tous en face, de jeunes enfans iront à l’entour d’eux avec des vaſes, des taſſes & des gobelets remplis d’un breuvage delicieux, qui ne leur fera point mal à la teſte, & qui ne les enyvrera pas, ils auront tous les fruicts qu’ils pourront ſouhaiter, &
