| 462 | L’ALCORAN. |
protection des idoles, mais Dieu eſt le veritable protecteur du monde, il reſſuſcite les morts, & eſt tout-Puiſſant, il jugera un jour toutes les difficultez, & reſoudra les doutes que vous avez de voſtre Religion, il eſt mon Seigneur, je me ſuis reſigné à ſa divine volonté, il a creé voſtre eſpouſe de vous-meſmes, il a creé tous les animaux maſles & femelles, & vous a fait multiplier ; il n’y a rien qui ſoit ſemblable à luy, il tient les clefs des treſors du Ciel & de la Terre, & oſte & donne le bien à qui bon luy ſemble. La loy que j’ay donnée à Noé, à Abraham, à Moïſe & à Jeſus, eſt celle que je t’ay ordonné d’obſerver ; à ſçavoir de croire en un ſeul Dieu. Les infidelles ſe faſchent quand tu leur preſche l’unité de Dieu, il l’enſeigne à qui bon luy ſemble, & conduit au droict chemin ceux qui luy obeiſſent, les meſchans approuvent une partie des poincts de ſa loy, & abjurent les autres, encore qu’ils ayent cognoiſſance de ſon unité, & ce par envie qui eſt arrivée entr’eux, ſi ton Seigneur n’avoit cy-devant dit qu’il differe leur punition au jour du Jugement, il les auroit deſja tous exterminez, pluſieurs de ceux qui apres eux ſeront heritiers de la cognoiſſance des eſcritures douteront de ſa loy ; mais ſuis le chemin qui t’a eſté ordonné,. & ne ſuis pas leurs appetits ; Dis leur, je crois au livre que Dieu a envoyé, j’ay receu commandement de vous preſcher que Dieu eſt voſtre Seigneur & le noſtre, vous reſpondrez de vos actions, & nous reſpondrons des noſtres, il n’eſt pas neceſſaire de diſputer entre nous,
