| DE MAHOMET. | 335 |
vray-croyans ſeront rigoureuſement chaſtiez en ce monde & en l’autre, Dieu ſçait ce que vous ne ſçavez pas ; ſi Dieu ne vous euſt gratifié, il vous auroit chaſtiez en flagrant delit, il eſt clement & miſericordieux. O vous qui eſtes vray-croyans, ne ſuivez pas les veſtiges du Diable, il vous commandera le vice & le peché, ſi Dieu ne vous euſt gratifiez de la miſericorde perſonne d’entre vous ne ſe ſeroit purge de cette impoſture, mais Dieu purifie qui bon luy ſemble, ils entend tout & ſçait toutes vos intentions. Les plus riches & les plus puiſſans d’entre-vous n’ont pas juré de ne point faire de biens, leurs parens, ny aux pauvres, ny a ceux qui combattent pour la loy de Dieu, neantmoins ils ne leur en font point, & les fuyent, ne deſirent-il pas que Dieu leur pardonne ? il n’eſt doux & clement qu’envers les vray-croyans. Ceux qui accuſent d’impudicité les femmes chaſtes, innocentes & fidelles, ſeront maudits en ce monde, & reſſentiront de grands tourmens au jour que leurs langues, leurs mains, & leurs pieds teſmoigneront contr’eux, en meſme temps Dieu leur payera ce qui leur ſera deub ſans injuſtice, & cognoiſtront que Dieu eſt la verité meſme. Les meſchantes femmes parleront comme les meſchans hommes, & les meſchans hommes comme les meſchantes femmeſ; les bonnes parleront comme les bons, & les bons comme les bonnes, les bons ſont innocens de l’impoſture des meſchants, ils joüiront de la grace de Dieu & des treſors du Pa-
