| DE MAHOMET. | 315 |
adoré au lieu de Dieu que les tiſons de l’Enfer où vous ſerez precipitez, ſi vos Idoles eſtoient Dieux comme vous l’avez crû ils ne ſeroient pas entrés de dans l’Enfer, eux & ceux qui les ont adorés feront eternellement damnez, ils gemiront, ils ſe plaindront, & ne ſeront pas eſcoutez, ceux qui ſeront dans le Paradis ſeront eſloignez d’eux, ils n’entendront pas leurs hurlemens, & jouiront eternellement de ce qu’ils deſireront, les cris des damnez ne les affligeront pas, les Anges les rencontreront lors qu’ils ſortiront des mouvements, & leur diront, voicy le jour qui vous a eſté promis au monde, pour auquel nous ouvrirons les Cieux & le livre de compte de tous les hommes, comme nous l’avons promis à ceux qui vous ont precedé, nous effectuons exactement ce que nous promettrons ; nous avons eſcrit en l’ancien Teſtament, & apres en l’Alcoran que les gens de bien ſeront heritiers de la terre, ce livre enſeignera le chemin de Paradis à ceux qui m’adoreront, nous ne t’avons envoyé que pour faire grace aux hommes ; Dis leur, Dieu m’a touſjours inſpiré que voſtre Dieu eſt un ſeul Dieu, ne luy obeïrez vous pas ? s’ils ſe devoyent, je vous ay enſeigné comme il les faut traiter ; Dis leur, je ne ſçay pas ſi la punition qu’on vous a promis ſera prompte ou tardive, Dieu ſeul ſçait tout ce qui eſt cognu & incognu dedans le monde, je ne ſçay pas s’il vous veut eſprouver, ou s il differera ſa punition juſques au temps ordonné, il eſt tres-juſte juge, & tres-miſericordieux, il n’eſt pas tel que vous dites.
