| 306 | L’ALCORAN. |
ton Seigneur n’euſt dit qu’il differera la punition des meſchants juſques au temps ordonné il les auroit deſja tous exterminez. Patience & ſupporte leur diſcours, loüe ton Seigneur avant que le Soleil ſe leve, avant qu’il ſe couche à une heure de nuit, & à la fin du jour, tu ſeras choſe qui luy ſera agreable, La vie du monde eſt belle pour vous tenter, mais les biens de ton Seigneur ſont meilleurs & ſont éternels. Ordonne au peuple de faire ſes prieres au temps ordonné, & ne ſois pas impatient envers luy, je ne te demande point de richeſſes, je t’enrichiray toy-meſme, & à la fin le Paradis ſera pour les gens de bien. Les infidelles ont dit, ſi (Mahomet) ne fait paroiſtre quelque miracle de la part de Dieu, & s’il ne ſçait l’explication des livres de nos predeceſſeurs, nous ne croirons pas en luy ; Nous avons avant ſa venuë exterminé pluſieurs impies qui ont dit, Seigneur ſi tu nous avois envoyé un Prophete nous aurions obſervé tes commandemens avant que d’eſtre honteux & remplis d’ignominie : dis leur, chacun attend ſa fin, attendez, vous connoiſtrez un jour ceux qui ſuivent le droict chemin, & qui ne ſont pas devoyez.
