| 22 | L’ALCORAN. |
vous ſerez conduits par le droict chemin. Nous vous avons envoyé un Prophete de voſtre nation qui vous enſeignera mes commandements ou vous purifiera Il vous enſeignera l’eſcriture, la ſcience & ce que vous ne ſçavez pas. Souvenez-vous de moy, je me ſouviendray de vous, loüez moy & ne ſoyez pas au nombre des impies. O vous qui eſtes vray croyans, demandez ſecours avec patience & oraiſons. Certainement Dieu eſt avec ceux qui ſont patients, Ne dites pas que ceux qui ſont tuez pour la defence de ſa loy ſont morts, au contraire, ils ſont vivans, mais vous ne le ſçavez pas. Je vous eſprouveray, & vous affligeray par la perte de vos biens & maladie de vos perſonnes, le Paradis ſera pour ceux qui ſeront patiens, & qui diront en leur affliction ; Nous ſommes reſignez en Dieu, & retournerons devant luy, pour eſtre jugés, ſa grace ſera ſur eux, & ne ſeront pas devoyez. Safa & Meroa[1] ſont des marques de ſa Puiſſance, celuy qui fera le pelerinage de la Meque, ne fera pas mal de viſiter ces deux lieux, celuy qui obeïra fera bien. Dieu recompenſe ceux qui font de bonnes œuvres, & ſçait tout. Je donneray ma malediction à ceux qui celeront mes commandemens, ils ſeront maudits de tout ce qui eſt au monde, excepté ceux qui ſe convertirons, qui feront de bonnes œuvres, & auront mis en lumiere ce qu’ils avoient caché, je leur donneray ma grace, je ſuis clement & miſericordieux. Les impies qui ſont morts en leur impieté
- ↑ Safa & Meroa ſont deux montagnes auprès de la Meque.
