| DE MAHOMET. | 239 |
tre que Dieu ? qui vous protegera autre que Dieu ? vos Idoles ne vous puvent faire ny bien ny mal, l’aveugle eſt-il ſemblable à celuy qui voit clair ? les tenebres ſont elles ſemblables à la lumiere ? adoreront-ils les creatures au lieu du Createur ? Dieu a creé toute choſe & eſt tout-Puiſſant, il fait deſcendre la pluye du Ciel, & fait couler dans les valées les rivieres couvertes d’eſcumes ; L’or, l’argent & les metaux que vous faites fondre pour vous parer & pour vous enrichir, ſont ſemblables à l’eſcume, ainſi Dieu enſeigne ce qui eſt utile, & ce qui eſt inutile, l’eſcume diſparoit promptement, & n’apporte point de profît aux hommes, ainſi diſparoit le menſonge devant la verité. Ainſi Dieu parle par parabole à ceux qui luy obeiſſent, & leur donne le Paradis. Toutes les richeſſes de la terre, & encore autant ne pourroient pas rachepter les infidelles, ils ſeront eternellement tourmentez dedans le feu d’Enfer. Qui ſçait que la verité contenue en ce livre ne t’a pas eſté envoyée de Dieu ? celuy qui en doute eſt aveuglé, les perſonnes d’eſprit n’en doutent pas. Ceux qui ſatisfont à ce qu’ils promettent à Dieu, qui ne contreviennent pas à ſes commandemens, qui ont ſa crainte devant les yeux, qui apprehendent le jour du Jugement, qui ſont patient en leurs afflictions pour l’amour de ſa divine Majeſté, qui font leurs prieres au temps ordonné, qui font des aumônes ſecretrement & publiquement, & qui effacent leurs pechez par leurs bonnes œuvres, ſeront bien-heu-
