| DE MAHOMET. | 211 |
eſt ſur eux & ſur les injuſtes qui ont devoyé le peuple du droict chemin, ils eſtoient veritablement infidelles ; Telle gens n’eviteront pas la punition de leurs crimes ſur la terre, ils ne trouveront perſonne qui les puiſſe proteger autre que Dieu, il augmentera leurs peines parce qu’ils ne veulent pas quitter leur impieté, ny recevoir la lumiere de la foy ; telles gens ſont gens perdus, leurs idoles ne leur donneront point de ſecours, ils ſeront ſans doute damnés eternellement ; & ceux qui croiront en Dieu, qui feront de bonnes œuvres, & le convertiront : demeureront à jamais dedans le Paradis. Les impies ſont ſemblables aux ſourds & aux aveugles, & les vray-croyans ſont ſemblables à ceux qui ont bonne veüe & bonne oüye, ſeront ils mis en paralelle les unſt aux autres ? n’y penſerez-vous jamais ? Nous avons envoyé Noé pour reprendre les hommes de leurs pechez, il leur a dit, n’adorez qu’un ſeul Dieu, autrement je crains que vous ne ſoyez chaſtiez au jour du Jugement : .Les Docteurs d’entre les infidelles luy ont reſpondu, nous voyons que tu es homme comme nous, & que ceux qui te ſuivent ſont pauvres gens aveuglez & ſans conſeil, nous ne voyons pas que tu ayes aucune grace qui te doive faire preferer à nous ; au contraire nous croyons que tu es un menteur, il a dit, ô peuple ne cognoiſſez vous pas que Dieu m’a enſeigné ce que je vous preſche, qu’il m’a donné la grace de Prophetiſer & qu’il vous en a privé, vous exorteray-je de recognoiſtre ſa grace
