| 12 | L’ALCORAN. |
ſeigné les commandemens de la loy, & comme nous avons dit aux enfans d’Iſraël ; Adorez un ſeul Dieu, faites du bien à vos pere & mere, à vos alliez, aux orphelins, & aux pauvres : parlez avec douceur au peuple : faictes vos prieres au temps ordonné, & payez les decimes ; neantmoins ils ont eſté desobeiſſans exepté fort peu d’entr’eux. Lors que nous avons receu les commandemens de Dieu, & que nous avons dit, Ne reſpandez pas voſte ſang, ne vous chaſſez pas de vos maiſons, vous l’avez approuvé, vous en eſtes teſmoins : Neantmoins vous en avez tué pluſieurs ; & en avez faict ſortir un bon nombre hors de leurs habitations, vous vous eſtes aydez les uns les autres dans l’injuſtice, & dans l’impieté. Si les eſclaves ont recours à vous, vous les rachepterez, leur delivrance vous eſt ordonnée, croirez vous en une partie des eſcritures pour abjurer l’autre ? La recompenſe de ceux d’entre vous qui feront telle choſe, eſt ignominie en ce monde, & d’eſtre precipitez aux plus griefs tourmens de l’Enfer, au jour du Jugement. Dieu n’eſt pas ignorant de ce que vous faictes ; Ceux, qui ont achepté la vie du monde pour quitter le Paradis, ne ſeront pas allegez en leurs miſeres, & ſeront privez de toute ſorte de ſecours. Certainement nous avons donné la loy à Moïſe, & avons envoyé aprés luy pluſieurs Prophetes : Nous avons inſpiré la ſcience à Jeſus Fils de Marie, & nous l’avons fortifié par le Sainct-Eſprit, mais vous vous eſtes eſlevez contre les Prophetes
