| 160 | L’ALCORAN. |
mes, & qui obeïſſent à mes commandemens, qui ſuivent le droit chemin, qui croyent au Prophete qui ne ſçait ny lire ny eſcrire[1] & en ce qui eſt eſcrit de luy dans l’ancien Teſtament, & dans l’Evangile, il leur commandera les choſes honneſtes, il leur deffendra les choſes inciviles, il leur enſeignera les viandes qui ſont mondes, & leur deffendra de manger celles qui ſont immondes, il les delivrera des ceremonies peſantes & facheuſes ;& des chaiſnes qui les tiendront étroitement liez ;ceux qui croiront en luy, qui l’honnoreront, qui le deffendront de ſes ennemis; & qui ſuivront la lumiere que nous luy envoyerons, ſeront tous bien-heureux. Dis au peuple, je ſuis veritablement Meſſager envoyé de Dieu à qui appartient le royaume des Cieux & de la terre, il n’y a qu’un ſeul Dieu, il fait vivre & mourir qui bon luy ſemble ; Croyez en Dieu & en ſon Prophete qui ne qui ne ſçait ny lire ny eſcrire[2] ; ceux qui croyent en Dieu en ſes paroles, & qui ſuivent le Prophete ſeront bien conduits, il ſuivront un tres-bon chemin. Il y a des perſonnes entre les enfans d’Iſraël qui ſçavent la verité, & jugent avec équité ? nous les avons ſeparez en douze tributs, lors que Moyſe a demandé à boire pour ſon peuple nous luy avons inſpiré de frapper de ſa verge le rocher, dont ſont ſorties douze fontaines, & chacun ſçeu le lieu où il devoit boire, nous les avons couverts de l’ombrage des nuës, nous avons fait deſcendre ſur eux la manne & les cailles, & leur avons commandé de manger
