Page:Jean le Bel - Chronique - tome 1.djvu/18

costables pennes et de samis et de cendal selont l’atemporement de temps, et avoit estat de chevaz et de maynyez alle avenant ; il avoit eut en ses jovenes jours fakenirs et brakenirs, chiens et oseaz, costablement, et estoit ses regiments cotidiens et ly escuwiers d’onneur qu’il avoit escoleit teilement affaitiez, que sains parler à leur maistre, s’ilh veoyent alcon vailhant homme estraingne, fuist prelaz, chevaliers ou escuwirs, ilh le prioyent, fuist al dyneir ou al sopeir, et selont ce estoit tosjours ses hosteit porveus ; et sy alcons princes s’enbatoit en la citeit, ilh convenoit qu’il dynast deleis ly ; ilh portoit tout habit de chevalier de pyet et de corps et del harnas de ses chevaz, et estoit costables de fermas et de botennires de pierles et de vrayes pires ; les cheveches de ses soplis estoient tous près overeez de pierles et estoit sa table onie et li bankes de sopeir estoit commons à toz, et as solempniteis, ons y siervoit en vasel d’argent ; ilh n’alloit onkes les commons jours delle samaine alle eglize qu’il n’awist 16 ou 20 persones quy le conduisoient, tant de ses proymes, come de ses maynyés et de cheaz quy estoyent à ses dras. Et quant c’estoit az jours solempnés, chil quy estoyent à ses dras, le venoyent quere en son hosteit et le mynoyent alle eglize. Sy avoit sovent fois assy gran rotte après ly com après l’evesque de Liege, car ilh avoit bin 50 ou de moins 40 parsiwans, quy tos demoroient al dyneir deleis ly, sy qu’il estoit chief et souverain de son linages, et selont ce ly portoyent sy proismes et amis honeur et reverence, et ilh les hantoit et avanchissoit en tos estas ; ilh donoit quarante owit paires de robes d’escuwiers et chink paires de robes à vayres, assavoir à trois cannones et à dois chevaliers. Ilh parsiwist les armes en jovente et servit al tournoy et fut delle hosteit Monss. Johan de Haynau, saingnor de Beamont et de Cymay ; ilh avoit bon sens natureit