L Y aura vne place derriere la porte ou au lieu le plus sordide de l’Escole, où l’on mettra vn petit ratelier auec du foin, vn vieux morceau de bride à cheual, où l’on mettra les paresseux : & mesme il y doit auoir attachés au dessus, vn vieux bonnet de carte auec des grandes oreilles d’asne faites de carte, qui y seront attachées, qu’il faut mettre sur la teste du paresseux, vn petit ais d’vn pied en quarré, où sera peinte ou attachée la figure d’vn asne, & vne petite attache pour le pendre ; il y aura quelque vieux haillon de tapis de droguet, pour seruir de housse, ou de manteau sur le dos de l’asne, & celuy qui sera mis en cette place sera reuestu de ces beaux habits d’asne, & promené par l’Escole, auec vn balay à la main, & attaché par le bras au ratelier en la place de l’asne, tant que le Maistre le trouuera à propos, & le fera huer de tous les Escoliers.
L y aura vne petite clochette attachée au plancher, grosse comme vn œuf, que l’on sonnera pour aduertir les Escoliers, tant pour les Prieres que pour le Catechisme, sortie & entrée &c. & mesme pourra seruir pour monstrer la façon de sonner quand on sert à la Messe, l’éleuation de la Sainte Hostie : quand le Maistre en fera l’exercice. Il y aura vne eau benistier à la porte, dans lequel vn chacun prendra de l’eau beniste auec respect, en entrant & sortant de l’Escole.
N quelque lieu commode de l’Escole, il y aura deux tablettes de bois, larges de huict pouces
