faire escrire en suitte à neuf heures, les autres qui resteroient, que l’on taschera estre de ceux qui escriuent A, B, C, seulement ou les mots. Afin que tous ayent fait à l’heure de la correction, & en ce cas ceux qui auroient ainsi commencé tard à escrire, attendront apres tous les autres à corriger.
E l’autre costé le long de la muraille au deuant de ces tables là, il y aura trois bancs de chaque costé, où seront assis ceux qui liront seulement, sans escrire ; mettant ceux de mediocre condition ensemble & les pauures ensemble. Ces bancs seront longs de dix pieds chacun ou moins selon la longueur du lieu. Le premier de chaque costé sera haut de quinze pouçes, & on y mettra ceux qui lisent en François. Le second d’vn pied, & on y mettra ceux qui lisent bien au Latin, & commencent à lire au François. Au troisiesme haut de neuf pouçes de chaque costé ceux qui sont à A, B, C, ceux qui espellent, & commencent à assembler leurs syllabes.
L y aura outre ces bancs, vn petit siege enuiron de six pieds en quelque lieu commode à la veuë du Maistre, pour mettre les nouueaux venus pour quelque temps, cinq ou six iours pour les reconuoistre, & les faire instruire des deuoirs & coustumes de l’Escole, & en suitte de cela on leur donnera place selon leur capacité, quand le Maistre l’aura reconnuë suffisamment, en les faisant reciter attentiuement les donnant en charge à quelqu’vn des plus zelés Escoliers à cét effet, afin de les bien stiler aux petites pratiques de l’Escole, à ce qu’ils ne puissent pecher par ignorance.
