faites, si l’on veut, auec des douues de muids, ou bien auec des ais de sapin : la 3. & 4. s’il en est besoin, seront de mesme hauteur que la deuxiesme.
L y aura vn siege à chacune desdites tables, pour asseoir les enfans qui escriront, qui seront ordinairement ceux qui estudient au Latin. S’il ny en auoit pas assés pour les remplir, on y pourra faire escrire de ceux qui s’y disposent, afin de remplir les places vuides : on pourra encor ranger des tables le long de la paroy où sont les fenestres, auec des sieges pour faire escrire les autres Escoliers selon le nombre, & le long desdites tables on mettra deux sieges, pour asseoir ceux qui ne lisent pas encor des plus apparents, taschant par cette petite separation de contenter tout le monde, les personnes de condition n’estant pas bien ayses que l’on mette leurs enfans (& ce auec raison) auec les pauures, qui sont ordinairement pleins de vermines & de saletés en leurs habits, aussi bien qu’en leurs paroles & postures. Il y a des lieux où le nombre des enfans estant de plus de cent, on pourra separer si on a lieu, les pauures en vne autre chambre.
Ans la seconde partie de l’Escole, il y aura des tables larges de trois pieds, ou les plus grands escriront des deux costés auec des sieges à proportion de sorte que l’on puisse trouuer en vne Escole de cent Escoliers, place pour faire escrire pour le moins soixante Escoliers ensemble, & que s’il s’en rencontroit dauantage, il faudroit faire commencer quelques vns de ceux qui escriuent seulement A, B, C, dés sept heures trois quarts afin de
