Iugement general, le Paradis, & l’enfer : laquelle sera collée aussi sur de la toille, & enchassée comme l’image du Crucifix pour estre mise sur la cheminée, & seruir souuent pour donner de la terreur aux enfans, en leur monstrant l’image de l’enfer, quand ils auront fait quelque faute comme de mentir ou dire des paroles sales & mauuaises &c. & les encourager à la vertu en leur monstrant le Paradis. Ces images seront espoudrées deux fois la semaine, auec vne queue de renard, ou vn balay de plume de chapon, ou vn linge.
V dessous du Crucifix, personne des Escoliers ne sera placé par honneur & respect, au Saint Sacrement, & à l’image du Crucifix ; le Maistre se placera dans vne chaire à bras qui aura le siège haut de deux pieds, en vn lieu, d’où il puisse voir tous les enfans : il pourra mesme esleuer sa chaire de deux pieds sur vn marche-pied, ce qui est assés commode.
Outre ces images on pourroit placer en diuers endroits de l’Escole, plusieurs placarts colés sur des cartons bien proprement, qui puissent seruir de bon motif aux Escoliers, pour les retirer du vice & les entretenir en la Vertu. De plus il restera vne place vuide pour placer l’image du Mystère, dont l’on se seruira, comme nous dirons cy-apres, au Catechisme & Instruction des Festes & Solemnisés principales de l’année. Il y aura mesme vn chassis de bois bien fait dans lequel on enchassera chaque image en son temps, quand on en aura besoin, lequel fera resserré de peur d’esgarement,
