le fait diligemment, & rendre la iustice, ou en punissant, ou en pardonnant : leur donnant neantmoins toûjours à entendre, qu’ils ont le tort & non iamais leurs parens, de peur qu’ils ne conçoivent, vne haine contre leurs parens & contre leur Maistre, pour ces fausses accusations.
2. Il faut leur faire reconnoisse & auoüer leur faute, & mesme (s’il y auoit moyen) leur faire auoüer qu’ils meritent correction, car le plus grand mal qui puisse arriuer à vn Escolier, & au Maistre, c’est de chastier vn enfant sans raison, ce qu’ils retiennent toute leur vie & n’en font aucun profit.
3. Il les faut empescher de crier durant, ou auant, ou apres le chastiment, les faire détacher, ou trousser & tenir eux mesmes, & s’ils crient, ou diffèrent à se détacher, ou trousser : il les faut chastier dauantage, & alors ils en seront plus souples. Que si quelqu’vn refusoit au Maitre quand il le veut corriger & qu’il demeurast obstiné ; il luy faut laisser refroidir le feu de sa colere, ne faisant pas semblant de rien : puis vne heure ou vne leçon apres, on luy doit faire entendre sa faute, & le chastier exemplairement devant tous les autres, & puis luy faire demander pardon à genoux à Dieu, au Maistre, & à tous les Escoliers qu’il a scandalizés, & en suitte, pour toutes les fautes quoy que petites qu’il fera, il le faut faire détacher & humilier, pour abaisser ce courage durant 15. iours : auquel cas il ne faut pas les faire tenir par aucun des Escoliers, de peur de querelle. Que si ceux là ou autres en les foüettant au apres le foüet, accusoient quelqu’vn de quelque faute, il faut chastier cét accusateur encor, & luy montrer combien cela est méchant, d’enuier son compagnon, & pardonner à l’accusé iusques à vn autrefois, si la faute n’est pas de consequence.
Page:Jacques de Batencour - L'Escole paroissiale, 1654.pdf/66
Le texte de cette page a été corrigé et est conforme au fac-similé.
