les nomment tout hault : & à mesme temps les faire mettre à genoux au milieu de l’Escole, puis ayant examiné leur faute les chastier ou les r’enuoyer à leur place.
L donnera ordre que les escoliers sortent modestement tant pour aller à la rue, qu’à l’Eglise. Cet pourquoy ils se garderont bien de faire aucune chose indecente dans les montées, dans la cour, ou dans la rue : comme de frapper, ou pousser les autres, crier, tempester, courir : mais qu’ils s’en retournent en leurs maisons tout droict, sans s’affecter, ny badiner en chemin, saluants honestement tous les honestes gens, qu’ils r’encontreront de connoissance, faisant voir par cette modestie exterieure, tant dans la rue que dans leurs maisons, le profit qu’ils font en l’Escole.
Pour celle qu’ils doiuent obseruer en l’Eglise, nous en parlerons dans le titre de la Pieté ; suffit de dire icy qu’ils n’y doiuent jamais parler, pour quelque cause que ce fait, mais qu’ils s’y doiuent comporter auec tout le respect & la reuerence deuë à vn lieu si Sainct, comme la Saincte Eglise : dequoy le Maitre leur monstrera vn tres fidel exemple, & à quoy il tiendra la main tres exacte, en chastiant rigoureusement les prophanateurs de la Saincte maison de Dieu.
Voila la Vertu & les pratiques de la Temperance, voyons maintenant la Force.
