pagnie des autres, ce qu’arriuant il doit examiner le fait en particulier & en cas que le coupable l’aduouë, il luy imposera vne penitence secrette, l’enuoyra à confesse, & le recommandera au Confesseur, taschant de voir la source de son peché, pour le retirer des occasions qui l’y ont porté, & le messe en la voye de salut ; l’enuoyant à confesse de temps en temps & ce à vn mesme Confesseur. Mais si le coupable de ce crime ne veut s’amender, il en aduertira les parens, puis le r’enuoyra & le mettra dehors, s’ils n’y donnent bon ordre, de peur qu’il ne gaste les autres. C’est pourquoy mesme ils ne doiuent iamais aller aux lieux deux ensemble. Et on leur doit encharger de ne iamais se descouurir ny se monstrer à nud deuant leurs seruantes ou sœurs, & encor moins de s’amuser à ioüer dans le lict auec leurs freres, ou domestiques, auec qui ils coucheroient. Le peril est encor à craindre quand ils couchent auec des seruiteurs : surquoy il les interrogera adroittement pour y donner ordre.
Il doit leur deffendre de iamais ioüer auec les petites filles, encor que ce fussent leurs sœurs, & le plustost qu’ils pourront s’habiller tous seuls, il leur recommandera de ne point se laisser habiller, attiffer, ajuster par leur seruantes ny leurs sœurs, ny se laisser jamais baiser : toutes ces actions estant tres-dangereuses.
Le Maistre se doit recommander à la saincte Vierge & à S. Ioseph, luy & toute sa petite famille, pour obtenir de Dieu, cette vertu Angelique, disant à la fin de toutes les prieres qui se font en l’Escole Iesus, Maria, Ioseph succurrite nobis, à cette intention.
