boiteux ayant demeuré auec vn Maistre boiteux : l’on en voit d’humeur douce, ayant vescu auec vn Maistre de douce humeur. L’on remarque des esprits querelleux & accariastres, parce qu’ils ont esté conduits par des Maistres qui auoient ce vice là. Saint Thomas d’Aquin, Saint Maur, Saint Placide, S. Oüen & ses freres, ayant esté esleués dés leur ieunesse par des Maistres sages prudents & vertueux, sont paruenus à vne grande Saincteté : au contraire Iulien l’Apostat ayant esté enseigné par vn Maistre idolatre, nourrit en son cœur cette perfidie, & quoy qu’il eust plusieurs Vertus Morales & en apparence Chrestiennes, auant qu’il fust Empereur ; neantmoins estant deuenu libre de ses actions, il descouurit le masque de son impieté, & se manifesta idolatre, & vn des plus cruels persecuteurs de l’Eglise de Iesus-Christ. Alexandre le Grand qui a subiugué toute la terre à son Empire, n’a pas peu s’exempter des vices qu’il auoit apris de son Maistre Leonides. Voyla le bien & le mal que peuuent causer les mauuais Maistres à l’endroit des enfans.
A prudence du Maistre consiste à estre exact à se contenir en son deuoir, il doit estre doux & graue aux enfans, non comme vne mauuaise mere les gastant en les flattant ; mais comme vn pere raisonnable se gardant bien de familiariser auec ses escoliers, qui le puisse faire mespriser : s’abstenant sur toutes choses de les baisotter, mignarder ou faire autres choses semblables, & ce pour plusieurs bonnes raisons : il doit auoir la patience pour supporter leurs deffauts, la prudence de les conduire & la methode pour les instruire vtilement. Ce n’est pas pourtant que cette regle soit absolument necessaire &
