Es actions specialles ausquelles il doit auoir recours à l’Oraison, c’est au commencement de la leçon, demandant lumiere à Dieu pour la bien faire ce iour la, en representant à sa bonté toutes les difficultés qui s’y rencontreront, & notamment s’il a preueu y en auoir ce iour la quelqu’vne : comme quand il aura à traitter auec des parens difficiles des enfans fascheux, & incorrigibles. Il pourra encor offrir cela durant la Messe qu’il entendra, ou celebrera, durant sa priere du matin, ou d’apres midy, offrant de bon cœur toutes ces petites ames à nostre Seigneur, à leurs Anges Gardiens & aux Saints Patrons du Diocese, & du Royaume, & apres les Prieres du soir & du matin, il doit remercier Dieu en general, & en particulier, du bon succez de sa leçon, demander pardon à Dieu des defauts qu’il reconnoistra auoir commis, faisant resolution d’agir mieux à l’aduenir, en preuoyant les moyens à cet effet auec sa sainte grace.
L doit auoir recours à Dieu deuant que de commencer ses Catechismes, taschant mesme d’aller à l’Eglise deuant le S. Sacrement, pour demander à nostre Seigneur l’effect de sa parole, qu’il anime son discours, & luy donne l’intelligence de ce qu’il a à traitter à ses enfans pour les en bien instruire, il inuoquera à Paris S. Denis comme l’Apostre de la France, qu’il luy plaise luy impetrer de Dieu vne portion de son Esprit, pour renouueller en l’Esprit de ses enfans la Doctrine qu’il a enseignée aux despens de sa propre vie. Et ailleurs le Saint Patron du Diocese.
