conceuoir vne ferme esperance que Dieu ne luy deniera rien s’il luy demande comme il faut.
L ’Acte principal de l’Esperance, c’est la Priere laquelle doit estre familiere au Maistre, puisqu’il rencontrera mille & mille occasions de s’en seruir.
Or la Priere doit estre faicte premierement, auec humilité, qui est vne humble reconnoissance de son neant & de ses pechez & imperfections, qui le mettent au dessous de toutes les creatures. Secondement, en esprit & verité. In Spiritu & veritate oportet adorare & Pater tales quærit qui adorent eum. C’est à dire qu’il faut adorer Dieu en esprit & en verité, & le Pere Eternel cherche de personnes de telle sorte qui l’adorent ; enseignoit nostre Seigneur à la Samaritaine. Troisiesmement, il faut demander au nom de nostre Seigneur : tout ce que vous demanderés à mon Pere en mon nom, il vous le donnera, quiequid petieritis Patrem in nomine meo, dabit vobis. Quatriesmement, auec ferueur & assiduité, ne se contentant pas d’auoir demandé deux, quatre, six fois vne mesme chose à Dieu : mais il doit reïterer, & continuer comme cette Veufue de l’Euangile, qui obtint par importunité ce qu’elle demandoit à ce Iuge si méchant, qui nec Deum timebat nec homines reuerebatur, & mesme si la chose est de consequence, il doit y adjouster le jeusne & l’aumosne pour l’obtenir : l’Oraison du Iuste continuée est bien forte, dit. S. Iacques, multum valet deprecatio iusti assidua. Bona est oratio cum ieiunio & eleemosina, l’Oraison est bonne, auec le Ieusne & l’Aumosne, disoit Tobie à son fils.
