Page:Jacques de Batencour - L'Escole paroissiale, 1654.pdf/265

comme vne s. 3. Quand le g, se rencontre auec vn a, vn o, & vn u ; il le faut faire sonner comme vn gamma grec qui s’appelle g dur. Quand il se trouue auec vn e, & vn i, il sonne comme vne j consonne ge, gi, qui s’appelle g mol. 4. Quand l’on trouue vne j. consonne joinct auec vne autre voyelle (ce qu’on connoistra quand il sera auec queuë) au lieu de dire j, a, ja, il faut dire je, a : ja : car ie m’estonne comme dans la methode ordinaire de plusieurs qui se sont meslés & se meslent tous les iours de monstrer la lecture, ils mettent vne double difficulté à faire prononcer l’j consonne, parce qu’il y a bien plus de difference entre dire j, a, ja que de dire je, a, ja : parce que pour distinguer l’i voyelle d’auec l’i consonne, faudroit prononcer l’vn ie, sans accent pour le distinguer du son du gé, estant bien raisonnable de luy donner vn son particulier, puisqu’il est marqué autrement que l’i voyelle. Quand t, se rencontre auec vn i, & qu’il suit vne voyelle apres, comme en ce mot ratio ; il le faut prononcer comme vn c, auec vn i. Quand l’u consonne se trouue auec vne voyelle, pour faire vne syllabe, comme ua, faut dire ué, a : ua, au lieu de dire u, a ; ua, y ayant autant de raison de donner vn son particulier à l’u consonne sans le prononcer comme l’u voyelle, puisqu’il y a beaucoup plus de facilité pour les enfans de dire ué, a, ua, que de leur faire deuiner le son de l’u consonne, en leur faisant prononcer dans l’assemblage des lettres, comme l’u voyelle. Voyla ce qui est de plus remarquable pour bien monstrer à assembler, nous en toucherons encor quelque chose dans l’article de la lecture Françoise. Cecy suffira pour la Latine, qui est le fondement des autres.