premiere leçon, leur faisant repeter trois ou quatre fois, puis les prenant à rebours leur fera monstrer auec la touche, & nommer ces trois ou quatre lettres, & en suitte les donnera à leur Decurion pour auoir soin de leur faire repeter leur leçon, & leur apprendre les 3. ou 4. suiuantes : à la seconde leçon, il leur doit faire repeter la premiere, & s’ils la sçauent bien, c’est à dire qu’ils connoissent & nomment bien les lettres, il leur fera repeter quatre autres lettres ensuiuant, & ainsi les donnera à faire reciter la premiere & seconde leçon à leur Decurion, & en suitte en apprendre vne autre pour le iour suiuant ; faisant toûjours repeter toutes les lettres precedentes, auant que de leur en faire apprendre de nouuelles. Quand il leur aura bien fait comprendre, connoistre & nommer toutes les lettres de l’Alphabet, il leur fera dire à rebours, puis leur fera toucher & nommer tantost vne lettre au milieu, tantost à la fin, tantost au commencement. Et quand ils sçauront bien ce premier Alphabet, il passera à leur faire apprẽdre les autres, & les abbreuiations & ligatures, selon la mesme methode. Le Maistre se gardera bien d’espouuenter les petits enfans dans ce commencement, les fouëttant, menaçant, se despitant contre eux, se souuenant au contraire de la mansuetude auec laquelle nostre Seigneur receuoit les enfans, leur tesmoignant de l’amour, sinon qu’il vit qu’il ne seruit de rien, & qu’il y eut de la malice ou paresse : ce qui ne se peut voir qu’auec le temps ; & en ce cas il y appliquera la correction temperée auec Prudence.
Page:Jacques de Batencour - L'Escole paroissiale, 1654.pdf/263
Le texte de cette page a été corrigé et est conforme au fac-similé.
