les sept Sacremens de l’Eglise : mais mesme qu’ils les sçachent expliquer : il faut qu’il connoissent encor les mysteres des principales Festes de l’année, la Vie des Saints Patrons du Diocese, de la Paroisse, ou de la Ville : afin d’en donner vne suffisante connoissance à leurs enfans, & comme vne bonne mere nourice, ils prennent la nourriture eux mesmes, pour la faire succer à leurs petits, qui attẽdent d’eux le laict de la Doctrine Chrestienne ; quasi modo geniti infantes : comme des petit enfants nouueaux nez en Iesus-Christ, & pour cét effect ils doiuent auoir des liures propres à cela, comme le Catechisme du Diocese, celuy de Turlot, le Pedagogue Chestien dernier imprimé à Mons, ou à Rouën, in quarto, & s’il entend le Latin, Hortus Pastorum & Catechismus Romanus, le Catechisme de Bellarmin & le petit Catechisme ou Instructions des Festes de l’année luy seront tres vtiles. Ce n’est pas assez de croire, & auoir la Foy speculatiue de tous les mysteres, mais il la faut tesmoigner par les œuures, & par exemple, portant vn grand respect à toutes les choses Saintes, ne parlant, ny souffrant iamais parler qu’auec respect de nostre S. Pere le Pape, de Messieurs les Prelats de l’Eglise, de ses Ceremonies, des Prestres, & de tous les Ecclesiastiques.
E Maistre aura soin de ne souffrir aucun liure aux enfans qui ne soit Catholique, & bien approuué des Docteurs, leur recommandant souuent de ne dire iamais ou parler contre les pratiques de l’Eglise, mais en honnorer toutes les ceremonies & Commandements.
S’il a des enfans des heretiques dans son Escole, il leur tesmoignera vne grande affection, les gouuernant auec toute sorte de ciuilité & bien-veillan-
