quatriesme la methode de s’en bien seruir, & la cinquiéme la maniere de la declarer, & l’enseigner aux autres : les deux premieres appartenant specialement aux petites Escoles, & le commencement de la troisiesme, à l’esgard de quelques enfans seulement, qui se disposent aux Colleges ; nous auons icy à traitter en nostre premier Chapitre, de la maniere de bien montrer aux enfans à lire en Latin & en François.
CHAPITRE PREMIER.
De la maniere de bien monstrer à lire Latin & François.
POur bien monstrer à lire, il se faut bien garder d’embrouïller les Enfans, en leur voulant enseigner tout à la fois, à assembler, lire, en François & Latin : mais il faut se seruir de l’ordre, & ne point entreprendre de les faire voler dans la lecture, auant que de sçauoir espeler les lettres : car voulant les aduancer en leur apprenant tant de choses à la fois, on leur rend la lecture si confuse, qu’outre qu’ils sont long-temps à apprendre, ils ne sçauent iamais bien lire, ny Latin ny François : estans comme vne maison qui n’a iamais esté bien fondée, à laquelle il y a toujours à craindre & à refaire. Pour proceder donc par ordre, il faut 1. Enseigner aux petits enfans à connoistre les lettres. 2. A les assembler pour en faire des syllabes. 3. A espeler les syllabes, pour en faire des mots ; & en suitte, lire les mots ; pour en faire des periodes Latines, puis bien lire en François.
