Dv Catechisme des Mysteres de
l’année sur l’Image.
Ors que les Solemnités des grandes Festes de l’année approchent, le Maistre doit instruire ses Escoliers, comme estant vne chose des plus necessaires à la vie Chrestienne, & neantmoins qui est si negligée par ceux qui sont chargés des enfans, comme leurs parens & leurs Maistres. Aussi est ce vne chose pitoyable, de voir la plupart des Chrestiens plus ignorants des Mysteres de leur Religion, & des Sainctes pratiques de l’Eglise, comme des ieusnes, des Processions &c. que des Turcs. C’est pourquoy ils n’assistent aux Solemnités, que tres peu, ou s’ils s’y trouuent, c’est sans esprit, ny deuotion : & tout cela vient faute de ce qu’ils n’en ont pas esté instruits ; notamment durant leur ieunesse. C’est dequoy ie pretens vous donner methode presentement.
Des iours que cette instruction se doit faire. §. 1.
Our proceder par ordre en cette methode d’instruction, il faut destiner premierement les iours
ausquels il faut proposer cette Doctrine aux enfans, qui sera le iour le plus proche de la Feste l’apres midy toute entiere, vn iour ou deux deuant, au lieu du Catechisme ordinaire du Diocese, qui sera obmis en ce cas, pour estre supplée au Dimanche ou Feste suiuante durant le Sermon, pourueu que les enfans ayent assés de temps pour l’apprendre, & que si on ne pouuoit acheuer toute la matiere de ce Catechisme au iour qui auroit esté pris, comme
