Page:Hypnérotomachie - éd. Martin - 1546.pdf/34

Premierement l’os de la teſte d’vn beuf, auec inſtrumentz ruſtiques, liez aux cornes, vn autel aſſiz ſur deux piedz de cheure, puis vne flamme de feu, en la face du quel y auoit vn œil, & vn vaultour. apres vn baſſin a lauer, vn vaſe a biberon, vn pelloton de filet trauerſé d’vn fuzeau, vn vaſe antique aiant la bouche couuerte, vne ſemelle auec vn œil & deux rameaux, l’vn d’oliue, & l’autre de palme, vn ancre, vne oye, & vne lampe antique, tenue par vne main, vn timon de nauire auſſi antique, auquel eſtoit attaché vne branche d’oliuier, puis deux hameſſons, & vn daulphin, & pour le dernier vn coffre cloz & ſerré, le tout entaillé de belle ſculpture, en ceſte ſormé.

Leſquelles treſantiques & ſainctes eſcriptures, apres y auoir bien penſé, i’interpretay en ceſte ſorte :

Ex labore deo naturæ ſacrifica liberaliter, paulatim reduces animũ deo ſubiectum. firmam cuſtodiam vitæ tuæ miſericorditer gubernando, tenebit incolumemque ſeruabit.       C’eſt a dire :

Sacrifie liberalement de ton labeur au dieu de nature, peu a peu tu reduiras ton eſprit en la ſubiection de dieu, qui par ſa miſericorde fera ſeure garde de ta vie, & en la gouuernant la conſeruera ſaine & ſauue.

Ie laiſſay a grand difficulté ceſte belle figure, tant fort elle me plaiſoit. puis retournay a regarder le grãd cheual, qui auoit la teſte ſeiche & maigre, proportionnement petite, & treſbien formée pour reſembler inconſtãt. On luy veoit quaſi trẽbler les muſcles, & ſembloit mieulx vif que feinct. En ſon frõt eſtoit graué ce mot grec GENEA. De tous ces grãs ouurages qui la giſoiẽt en mõceaux, le temps auoit ſeulemẽt eſpargné ces quatre belles & excellentes pieces, aſauoir le cheual, l’elephant, le coloſſe, & la porte. O nobles ouuriers antiques, quele cruaute aſſaillit ſi rigoureuſement voſtre vertu, q̃ vous

auez