Ce cheval eſtoit poſe ſur vne lame ou platine de la meſme matiere, & tout d’vne fonte, laquelle eſtoit antee & plombee ſur vne grand contrebaſe de marbre blanc : & n’auoit le cheual (ainſi que ie pouoie comprendre) eſté encores cheuauché d’aucun, a ſouhaict. parquoy ces ieunes enfans ſembloient dolens ſans voix plainctiue, pource qu’ilz en eſtoient priuez, & n’auoiẽt fors la demonſtration de vie dans l’vſaige. Il ſembloit que le cheval les vouluſt mettre & introduire dedans celle porte : car il eſtoit tourné de ce coſté. La cõtrebaſe eſtoit maſſiue, proportionnee en lõgueur, groſſeur & haulteur, pour ſouſtenir ſi grand machine, diuerſifiée de veines differentes en couleurs. Au front qui regardoit la porte, eſtoit entaillé vn chapeau de triumphe de marbre verd, a fueilles de Peucedan, autrement dict queue de pourceau : & au dedans d’iceluy les lettres qui ſ’enſuiuẽt, grauees en la pierre blanche. En la ſace oppoſite, & deuers la croppe du cheual, y auoit vn autre pareil chapeau de fueilles d’Aconite mortel, auec autres lettres, diſant :
| Dedié aux dieux ambiguz. | Le cheual d’infelicite. |
En la face longue du coſté droict, eſtoient entaillees aucunes figures d’hommes & de femmes danſans, qui auoient chacun deux viſaiges, l’vn riant, & l’autre pleurant. Ilz danſoient en rond, ſ’entretenans par les mains, homme auec homme, & femme auec femme, vn bras de l’homme paſſant par deſſus celluy de la femme, & l’autre par deſſoubz, en tele maniere que touſiours vn viſage ioieux eſtoit tourné contre vne face triſte : & eſtoient en nombre deux ſois ſept, ſi perfaictement entaillez
