La pyramide eſtoit compoſee en forme de perron, contenant mille quatre cens & dix degrez, dont les dix derniers eſtoient conuertiz en vn merueilleux cube ou pierre quarrée maſſiue, faiſant la diminution & eſtreciſſement de la pyramide, tel & ſi grãd qu’il eſtoit impoſſible de croire que mains d'hõmes l’euſſent peu aſſeoir ſi hault, faict de celle meſme pierre de marbre dont eſtoient les degrez, & la mis pour baſe & fondement de l’obeliſque duquel ie parleray cy apres. Il auoit quatre pas de diametre par chaſcune des faces de son quarré. aux quatre coingz d’enhault ſur les lignes diagonales, eſtoient fichez & plombez quatre piedz de Harpyes, veluz & argottez, faicts de metail de fonte, finiſſans deuers le hault en vn fueillage antique entrelaſſé, qui embraſſoit le pied de l’obeliſque ſouſtenu ſur ces quatre piedz ou pattes de Harpyes, qui auoientt deux pas de haulteur : & autant en auoit le diametre de l’obeliſque deuers le bas. ſa lõgueur contenoit ſept fois autant, diminuãt peu a peu iuſques a ſa poincte, tout d’vne ſeule pierre Pyropecile Thebaique, eſcripte de lettres hieroglyphiques Egyptiennes, en ſes quatre faces & coſtez poly & reluiſant comme vn miroer bien fourby. Sur la poincte eſtoit faicte vne nymphe de cuyure doré, plãtée ſur vn vaſe tournoiant en forme de pyuot, ouurage certainement pour rendre eſbahiz tous ceulx qui le regardoiẽt : car la nymphe eſtoit faicte en telle proportion, qu’eſtãt poſée ſi hault en l’air, elle ſe monſtroit perfaictement de ſtature ordinaire. Et oultre ſa grandeur, c’eſtoit choſe eſtrange a conſiderer comment elle auoit eſté leuee & portee ſi hault. Son veſtement voloit al’entour d’elle comme eſtant enleué du vent ; ſi biẽ que lon veoit partie de ſa cuiſſe deſcouuerte : & auoit deux aëlles eſtendues & ouuertes, ainſi que ſi elle euſt eſté preſte a voler, deuers leſquelles ſon regard eſtoit tourné. les cheueux luy voletoient par deſſus le front en grande abondance : mais elle auoit le derriere de la teſte chauue, & ſans poil. En ſa main droicte a l’obiect de ſon regard, elle tenoit vne corne d’abõdace, pleine de tous biens, tournée deuers la terre. l’autre main repoſoit ſur ſa poictrine, qui eſtoit nue. Ceſte ſtatue eſtoit ſacilement tournée par tous les vens, auec tel bruit, pour le frayer de la baſe qui eſtoit d’arain, & creuſe, qu’onques tel ne fut ouy. Ie ne penſe pas que iamais ait eſté vn tel obeliſque : certes celluy du Vatican a Rome, n’eſt point pareil, ny celluy d’Alexandrie, ny meſmes ceulx de Babylone. Il auoit en ſoy ſi grand comble de merueille, que i’eſtoie rauy d’eſbahiſſemẽt en le contemplant, & encores plus pour ſa grandeur ineſtimable, car ie ne pouoie penſer ny comprendre, comment, par quelle inuẽtion, auec quelz organes, grues, & cabres, vn ſi grand poix & fardeau auoit eſté leué ſi hault. Mais pour retourner a la pyramide, elle eſtoit fondee ſur vn grãd plinthe, maſſif cõme i’ay dict, qui auoit quatorze pas de haulteur, & ſix ſtades de longueur, faiſant le ſoubaſſement du premier & plus bas degré. lequel plinthe n’auoit (a mon iugement) eſté lá apporté d’ailleurs, mais taillé de la meſme roche en ceſte forme, & approprié en ſon lieu naturel a ceſte grande ſtructure. Le demourant des degrez eſtoit ſaict de quartiers de marbres, aſſemblez & diſpoſez par ordre. Le plinthe ne touchoit pas aux mõtaignes, mais en eſtoit elongné de chaſcun coſté la lõgueur de dix pas. En ſa face dextre a l’endroict par ou ie vins, & au mylieu de ſon quarré, eſtoit entail-
