Page:Homère - Les dix premiers livres de l’Iliade trad. Salel 1545.djvu/321

De bon Conſeil, pour noz Gens ſoulaiger
Et preſerver les Vaiſſeaulx de danger.
Meſme voyant que Iuppiter ſ’adonne
Aux Ennemys, & qu’il nous habandonne.
Ie n’ay jamais veu ny ouy compter,
Qu’ung Homme ſeul peuſt tant executer
De Vaillantz Faictz, comme par ſa Proueſſe
À faict : Hector au jourdhuy ſur la Grece.
Il n’eſt de Dieu ny de Deeſſe Filz,
Et touteſfois il nous a Deſconfitz.
Et croy pour vray qu’aux Gregeois ſouviendra
De ceſt Effroy tout le temps qui viendra,
Ie ſuis d’advis doncques que tu t’en voiſes
Diligemment juſques aux Nefz Gregeoiſes
Devers Ajax & le bon Roy de Crete :
Pour les prier tous deux a ma Requeſte,
De ſ’en venir au Conſeil. Ie verray
D’aultre coſté, ſi mener ie pourray
Le Viel Neſtor juſques au Guet : pour veoir
Comme on pourra a noſtre Faict : pourveoir.
Son Filz eſt Chef, avec Merionés,
De ceulx qui ſont pour le Guet ordonnez.
Et penſe bien qu’aulcun d’eulx ne fauldra
D’executer ce que Neſtor vouldra.
    Menelaus dict : lors. Ie te demande,
Quand j’auray faict : ce que ton Vueil commande :
Ne veulx tu pas que vers toy ie retourne
Incontinen ou que la ie ſejourne
Les attendant, pour avec eulx venir ?
    Il vauldra mieulx au prés d’eulx te tenir,
Afin (dict il) que nul ne ſe forvoye,
S’il aduenoit qu’ilz prinſſent aultre Voye,