Page:Homère - Les dix premiers livres de l’Iliade trad. Salel 1545.djvu/242

Non quand Heleine, & tout le bien de Troie
Seroient baillez. Qui eſt cil qui ne voye
(S’il n’eſt Enfant, & hors de cognoiſſance)
Qu’ilz ſeront mis ſoubz noſtre obeiſſance
Ung de ces jours : & que le temps ſ’approche,
Qu’on punira ce tant villain reproche ?
Ainſi parla, dont il fut bien loué :
Et ſon advis de chaſcun advoué.
    Agamemnon adonc dict au Herault,
Tu as ouy preſentement tout hault,
L’intention des Gregeois je ne veulx
Et ne pourrais reſpondre, que comme eulx.
Quant à la Treſve elle t’eſt accordée,
Ne plus ne moins que tu l’as demandée.
Ie ne doibs pas a l’encontre eſtriver,
Pour les occis de ſepulchre priver.
La haine doibt touſjours eſtre effacée,
Quand la perſone eſt morte ou treſpaſſée,
Or faictes donc tous les Mortz aſſembler
De voſtre part, afin de les Bruſler,
Ou Enterrer; Nous ſerons les ſemblable.
Et pour teſmoing Certain & Véritable
De noſtre Foy, & Serment reciproque :
Ô Iuppiter à preſent je t’invoque.
Diſans ces motz, envers les haultz Cieulx dreſſe
Son Royal Sceptre, en ſigne de Promeſſe.
    Le bon Hérault ayant tout entendu,
Diligemment ſ’eſt à Troie rendu :
Ou il trouva les Troiens, qui eſtoient
Tenans Conſeil, & fort le ſouhaictoient.
Si leur compta la Reſolution,
Et vray Exploict de ſa Legation.