Page:Homère - Les dix premiers livres de l’Iliade trad. Salel 1545.djvu/182

    Ne doubte plus Amy doreſnavant
De l’aſſaillir, ſ’il te vient au devant
(Dict lors Pallas) Ne fay difficulté
De le combatre, & l’aultre Deité
Qui ſe vouldra contre toy preſenter.
Va hardiment encontre luy jouſter.
C’eſt ung Cauſeur, ung Baveux, ung Vanteur,
Et qui pis eſt, variable & Menteur.
À ce matin il m’avoit faict promeſſe
De batailler en faveur de la Grece :
Et maintenant comme fol inconſtant
Il eſt contre eulx, pour Troiens combatant.
    Diſant ces motz, feit Sthenelus deſcendre
Du Chariot, & ſ’en va le Frain prendre
Des beaulx Chevaulx, deſirant les conduire
Et pour ce jour Diomedés inſtruire.
Le Chariot (pour la grand peſanteur
De la Deeſſe, & du fort Combateur)
Ployoit deſſoubz : & l’Eſſieu tres puiſſant
En fleſchiſſoit ſoubz le Char gemiſſant.
    Ainſi ſ’en vont, en propos de combatre
Mars furieux, le bleſſer ou l’abbatre.
Et pour garder de n’eſtre deſcouverte,
Pallas avoit lors ſa Face couverte
Du grand Armet de l’Infernal Pluton,
Faict à moitié de Fer & de Layton.
    Quand Mars le veid ainſi venir grand erre,
Il laiſſe ung Grec, qu’il avoit mis par terre,
Etolien nommé Periphantés,
Fort renommé entre les plus vantez,
Et delibere au fort Gregeois bailler
Le coup de mort, & puis le deſpouiller.