Page:Homère - Les dix premiers livres de l’Iliade trad. Salel 1545.djvu/177

Dont les Moyaulz entaillez par art gent,
Eſtoient auſſy maſſifz de fin Argent :
L’Eſſieu d’Acier, le Timon de Métal
Clair Argentin, auſſy beau que Criſtal.
Et quant au ſiege, il fut environné
D’orfaverie, & ſi bien atourné
Qu’on ne ſcauroit donner raiſon entiere,
Qui valoit mieux, l’Ouvrage ou la Matiere.
    Ce temps pendant que l’on diligentoit
Au Chariot, Minerve ſ’appreſtoit :
Si deſpoilla ſon riche Acouſtrement,
Qu’elle avoit faict, & tyſſu proprement.
Et puis ſ’arma de la Cuyraſſe forte,
Que Iuppiter en la bataille porte.
Conſequemment ſur les Eſpaules charge
Le grand Eſcu, pelant, horrible & large,
Environné de Crainte, & de terreur,
Contention, Noyſe, Audace & Horreur,
Fureur, Clameur, & Menace terrible,
Auquel eſtoit paincte la Teſte horrible
De la Gorgone, epoventable Monſtre,
Eſtonnant tout ce qui vient à l’encontre.
Encores plus, elle couvrit ſa Teſte
D’ung grand Armet, d’Or fin, à triple Creſte,
Qui ſuffiroit aux chefz des habitans
De cent Citez, lors qu’ilz ſont combatans.
Ainſi armée, au Chariot monta
Legerement, & la Lance porta :
Avec laquelle, elle abbat & repouſſe
Les Demydieux, quand elle ſe courrouſſe.
Dame Iuno d’aultre part tint la Bride
Des bons Chevaulx, voulant ſervir de Guide.
    Tant ont couru, quelles vindrent aux Portes
Du Ciel haultain, bien fermées & fortes.