Page:Homère - Les dix premiers livres de l’Iliade trad. Salel 1545.djvu/174

Pour ſecourir, ou emporter le ſien.
Premierement le Prince Licien
Fut relevé, & mis hors de la Foule :
Non ſans grand mal, Car le ſang qui découle
L’affoybliſſoit, & en l’en amenant
Alloit touſjours le javelot traynant
Dedans ſa Cuyſſe, On n’avoit loiſir lors
De le tirer tout gentement dehors
Tlepolemus auſſy fut emporté
Par les Gregeois, en ung aultre coſté.
    Lors Vlyſſés qui bien veid la Deſfaicte
De Tlepoleme, & la belle Retraite
De Sarpedon, fut dolent en ſon cueur :
Et diſcouroit ſ’il faloit au vainqueur
Courir ſoubdain, ou ſ’il devoit fraper
Les Liciens, & mortz les decouper.
Finablement encontre iceulx ſ’adreſſe
Suyvant l’advis de Pallas la Deeſſe.
Car auſſy bieſt la mort predeſtinée
De Sarpedon, n’eſtoit pas aſſignée
À Vlyſſés : la prudence divine
La reſervoit, pour quelque aultre plus digne.
    Il occiſt lors Ceranus, Chromuis,
Et Alaſlor, Alcander, Halius,
Puis Noemon, Prytanés, & de faict :
Il euſt encor plus grand nombre deffaict :
Sans le vaillant Hector, qui a grand cours
Vint ſur les Rencz, pour leur donner ſecours :
Donnant frayeur, avec ſes claires Armes
Aux plus hardiz de tous les Grecs gendarmes.
Trop fut joyeux Sarpedon le voyant,
Et puis luy dict tendrement larmoyant;