Page:Homère - Les dix premiers livres de l’Iliade trad. Salel 1545.djvu/173

Tu es bien loing de ſa Force & vertu :
Et qui ſoit vray, ton peuple eſt abbatu
Devant tes yeulx, tes Souldards de Licie
Sont deſconfitz, & l’on ne ſ’enſoucie.
Si ne voy pas, quel ſecours tu peuz faire
À ces Troiens laiſſant les tiens deffaire.
Mais c’eſt tout ung, car auſſy de mon Fer
Tranſmis ſeras bas aux portes d’Enfer.
    Sarpedon lors de la Menace fole
Ne ſ’eſtonna, mais reprint la parole,
Et reſpondit il eſt tres veritable,
Que pour la Faulte & injure notable
Qu’on feit adonc à ton Pere Herculés,
Troie fut priſe, & ſes Palays brullez.
Mais quant à toy pas ainſi n’adviendra,
Car mon ſort bras ores mort t’eſtendra :
Dont l’Ame ira en la region noire :
Et j’acquerray grand renommée & gloire.
    À tant ſont fin à leur contention,
Branſlent leurs Dardz, avec intention
S’entretuer, & ſi bien les adreſſent,
Que de ce coup cruellement ſe bleſſent.
Le javelot de Sarpedon paſſa
Parmy le corps du Grec, qui treſpaſſa
Deſſus le Champ. Quant au ſien il penetre
Bien rudement en la Cuyſſe ſeneſtre
De Sarpedon, ſi avant que la Poincte
Fut dedans l’Os attachée, & conjoinctre :
    Et n’euſt eſté le vouloir du grand Dieu,
Il eſtoit mort, ſans bouger de ce lieu.
    Quand les Souldards voirent couchez en terre
Ces deux grans Ducz, chaſcun vint à grand erre