Page:Homère - Les dix premiers livres de l’Iliade trad. Salel 1545.djvu/172

Et bien qu’il fuſt homme de grand vaillance,
Il n’en eut rien, fors ſeulement ſa Lance
Qu’il arracha, en mectant ſur le corps
Ses deux Tallons, pour la tirer dehors.
Et cela faict, des Troiens repoulſé,
Se retira eſtant preſque laſſé.
    D’aultre coſté la dure Deſtinée
La preparoit la derniere journée,
Au vaillant Filz d’Hercules Tlepoleme :
En l’incitant par hardieſſe extreme
S’adventurer, & mectre à l’habandon,
Contre le ſort & Divin Sarpedon.
Si le va joindre, & lors eulx deux eſtans
Preſtz à tirer en vaillantz combatans,
Tlepolemus avant faire voler
Son javelot, voulut ainſi parler.
    Quel grand beſoing, quelle neceſſité.
Ta cy conduict devant ceſte Cite
Homme Couard, & de nulle valeur,
Pour recevoir la mort par ton malheur ?
Certainement bien t’ont voulu flatter
Les faulx menteurs, diſans que Iuppiter
T’a engendré car ton laſche courage
Eſt trop divers, de ſi divin Lignaige.
Penſerois tu en vaillance approcher
À Herculés qui fut mon Pere cher
Fort & hardy, ayant cueur de Lion :
Lequel jadis print d’aſſault Ilion,
Avec ſix Nefz amenées de Grece :
Pour ſe venger de la faulſe promeſſe
Que luy feit lors le Roy Laomedon,
De luy donner ſes Chevaulx en guerdon ?