Page:Homère - Les dix premiers livres de l’Iliade trad. Salel 1545.djvu/151

Et ſ’ilz pourroient à la neceſſité
Nous ramener tous ſains en la Cité.
Fay l’vng des deux, ou bien ſers moy de Guyde,
Et de Carton, pour leur regir la bride :
Ce temps pendant que je m’efforceray
De le combatre, ou bien je le ſeray.
    Il eſt meilleur que tu faces l’office,
(Dict Pandarus) car ilz ſeront ſervice
Au Conducteur qui leur donne à menger,
Plus voluntiers qu’à ung aultre eſtranger.
Puis ſ’il faloit nous retirer, je crains
Que les Chevaulx prenans aux dentz les frains,
Feuſſent reſtifz : deſirans la voix claire,
De celuy la qui touſjours les modere :
Dont adviendroit que le Grec aggreſſeur,
Pourrait apres en eſtre poſſeſſeur.
Gouverne donc tes Chevaulx, & me laiſſe
Faire l’eſſay de ma force & proueſſe.
    Diſant ces motz, les deux gentilz Souldards
Faiſans branſler bien fierement leurs Dards,
Marchent avant leſquelz furent cognuz
Par Sthenelus qui dict, Voicy venuz
Deux ennemys, contre nous (Amy cher)
Fort deſirans nous joindre & approcher.
Tous deux ſont fors, l’ung experimenté
De tirer droict, l’aultre touſjours venté
Entre Troiens pour preux & magnanime,
Filz d’Anchiſés, qui ſe love & eſtime
D’eſtre conceu de Venus l’amoureuſe :
Doncques voyans l’attente dangereuſe,
Ie te ſupply reculons ung petit,
Et ne te preigne ainſi grand appetit